#3: Royal Greenland tuluit nunanni naapiguk
Angallammik takkuttoqaraangat… Royal Greenlandip kilisaataasa ilaannit saarullinnik qerisunik ulikkaartumik, taava amerlanertigut Grimsby & Imminghamimi tulattarpoq. Tamanna tassaavoq Tuluit Nunaata avannaata kangiani, annermik aalisakkanik qalerualinnillu assartuinermut umiarsualiviit pingaarnersaat.
Umiarsualivimmi Grimsby & Imminghamimi nioqqutissanik Tuluit Nunanni sumiiffinnut tamanut nassiussorneqartussanik immikkoortiterisoqartarpoq – Tuluit Nunaanni imaanik ungalugaasumi ukiorpassuarni aalisarnermik aallussisoqarsimavoq, taamaammat aalisakkat qaleruallillu tuluit nerisaannut ilaalluinnarput. Innuttaasumut ataatsimut ukiumut agguaqatigiissillugu aalisakkat qaleruallillu 24 kg. missaat nerisarineqarput, taamaammat niuerfik suliffeqarfimmut Royal Greenlanditut ittumut aalisakkat qaleruallillu tungaasigut periarfissaqarluarpoq.
Fish & Chips, tassaasut tuluit nerisassiaat nunarsuarmi tamarmi tusaamaneqarluartut, suli aalisakkani nererusunneqarnerpaat ilaanniipput, pingaartumik Tuluit Nunaata sineriaani aasaatillugu. Pomfritit kissalaartut silittut qaavani saarulliup nerpii qallerlugit siatat mamarluinnartut, tassaapput mamarineqarluartut Tuluit Nunaanneersut.
Fish & Chipsit suminngaanneerpat
Fish & Chipsit suminngaanneerpat
Ilisimaviuk? Fish & Chips juunimi tallimanngornermi siullermi ulloqartinneqarput.
Commercial Manager Tony Roberts ukiuni arfineq marlunni Royal Greenlandimiissimasoq imerniartarfinnut neriniartarfinnullu Tuluit Nunaanniittunut saarullippassuarnik tunisaqarsimavoq: "Saarulliit assigiinngitsut marluk Royal Greenlandimeersut piumaneqarnerpaat tassaapput: saarullik sinerissap avataani aalisarneqarnikoq qerisoq, kiisalu piumaneqarluartoq saarullik Nutaaq®-tut tunisassiaq Kalaallit Nunaata kitaani sinerissap qanittuani aalisarneqarnikoq,” Tony oqaluttuarpoq.
Royal Greenlandimi Tuluit Nunaanni niuernermut aqutsisoq, Tony Roberts, nioqqutinut tunngatillugu aaqqissuussami tamussigassanik agguaavoq.
Ulloq unnuarlu kiffartuussineq qaffasissoq
Tony tassaavoq Royal Greenlandimi misilittakkat piginnaasallu assigiinngitsut atorlugit Tuluit Nunaanni niuerfimmik sullissisut ilaat. Manchesterimi allaffimmi suleqatigiit nunanit assigiinngitsunit tallimaneersut Tuluit Nunaanni pisisartunik aningaasaqarnerup, assartuinerup, pilersuinerup, teknikkeqarnerup, tuniniaanerup nittarsaassinerullu tungaatigut sullissisuupput.
Pisortaaneq Randall Jennings Manchesterimi 2013-mi aallartittoq itisuumik anersaariarluni ukiut kingulliit tallimat-arfineq marluk utersaarfigai: "Tuluit Nunaata EU-mit aninissaanut taasinissaq piviusunngormat inatsisinut nutaanut tulluarsarnissatta suliarujussuunissaa ilisimavarput. Tassungalu ilutigalugu aalisakkanik qalerualinnillu Kalaallit Nunaanneersunik niuernissamut isumaqatigiissusiornitsinni Kalaallit Nunaanni oqartussat niuerfimmi pissutsinik paasitinniarlugit ikiorpagut. Taamanikkut – sulilu maannamut – ajornakusoorsimaqaaq, suleqatigiillu nioqqutissat Kalaallit Nunaanneersut akitsuuserneqarneranni niuerfimmi aaqqiissutissanik nutaanik ujartuisimanerat pitsaalluinnartumik ingerlasimavoq. Taava Covid tullinnguulluni 2020-mi takkuppoq! Randall qungujuppoq nangillunilu: "Taamanikkut suut siumulernerlugit ilisimasimannginnatsigu nuannaarpunga – ullumikkulli suliassatigut, suliassarissallugit takorloorsimanngisaannakkatsigut, patajaannerujussuarmik inissisimallutalu paasisimasagut misilittakkagullu annertunerulerput. Pisut taamaattut suleqatigiinnitsinni patajaassutsimik ajugaarusussutsimillu pilersitsisimapput”.
Royal Greenland attavinnik pilersitsivoq
Tuluit Nunaanni suleqatigiit pingaartitaasa ilaat tassaavoq suliassaqarfimmi suleqatitut pingaarutilimmik patajaatsumillu inissisimanissaq. Taamatut anguniagaqarneq Tuluit Nunaanni pisisartunik tamanik igaffissuaqarfinnut niuerfimmik, nerisassiornerup silarsuaanik, igasunik, niuertartunik pisisartullu ileqquinik paasisisimasaqarluarnissamik nassataqarpoq, tamannalu Tuluit Nunaanni tuniniaavinni tamani pisisartunik attaveqateqarnissamut piareersaataalluarpoq.
Tuniniaanermi ingerlatsisup Andrew Wrigleyip aamma nittarsaassinermut ingerlatsisup Solenne Labarerep, ulluinnarni ulapinnerminni niuerfinnik misissuinernik kiisalu igasut atuisullu atorlugit misissuinernik aallussinissartik pingaartitaraat: "Igasut amerlanerpaartaat aalisakkanik qalerualinnillu inniminniileraangamik kiisalu nerisassiassaminnik aaqqissuileraangamik annikitsualuit tamarmik eqqarsaatiginissaannut piffissaqarneq ajorput. Pilersuisuuginnarnata aalisakkanik qalerualinnillu pilersuisoorusuppugut pisisartutta tatigisaat”, Andrew nassuiaavoq. ”Pisisartutsinnut patajaatsumik suleqatigiissinnaaneq kiisalu tunisassianik igaffimminni tatigalugit atortuarsinnaasaminnik pilersuisinnaanerput takutissavarput”.
Tatigeqatigiinnissaq pilersissagaanni oqaloqatigiinneq kiisalu pisisartut pisariaqartitaannik paasisimasaqarluarneq pingaaruteqarluinnarput. Maanna juunip qaammataani Solenne aamma Andrew upernaap ingerlanerani igasut toqqakkat neriniartarfinnit arlalinneersut misissuilluni oqaloqatigineqarnerannit inernerit katersuleruttorpaat.
Raajat pitsaanerpaat
Royal Greenland ukiorpassuarni raajanik issittup imartaaneersunik Tuluit Nunaanni niuerfinnut nunarsuarmi raajanut niuerfiit annersaannut tuniniaasarsimavoq. Puussiat tungujortut, qernertut kuultitullu qalipaatillit Royal Greenlandip ilisarnaataanik ilisarnaatillit igaffissuaqarfinneersunit sandwichinillu tunisassiortunit raajat pitsaanerpaartaattut taaneqartarput.
"Nunarsuarmi raajanut niuerfiit annerpaartaanni pilersuisut annerpaartaattut igaffissuaqarfiit pisisartullu piumasaannik paasinnilluarnissatsinnut annertuumik pisussaaffeqarpugut", Solenne nassuiaavoq: "Atuisunik misissuinerit takutippaat raajat issittup imartaaneersut tungusunnillutillu isseqarluartut, aammattaaq nerisassianut assigiinngitsorpassuarnut tulluartut. Tamatuma saniatigut raajat issittup imartaaneersut pissuseqatigiiaanut allanut sanilliullugu allaanerussuteqarput, tassa nerisassianut ilisimaneqarluartunut rejecocktailinut nutaaliaanerusunullu poke-bowlsinut kiisalu nerisassianut oqinnerumaanut soorlu salaatinut sandwichinullu atorneqarsinnaammata".
Royal Greenlandip Tuluit Nunaanni immikkoortortaqarfia raajanik nunatsinni aalisarneqarsimasunik tuniniaasarpoq. Tuluit Nunaata EU-mit aninerata kingorna raajat tuniniarneqartut Canadami Davis Strædemeersut amerliartorput, tassanilu Royal Greenland Canadami aalisartoqarfinni qulingiluani tunisassiorfinnik qulingiluanik piginnittuullunilu ingerlatsisuuvoq.
Canadami tunisassiorfiit ilaat Tuluit Nunaanni niuerfimmut pilersuisuusoq tassaavoq tunisassiorfik St. Anthonymiittoq Royal Greenlandimit pigineqarlunilu ingerlanneqartoq.
Royal Greenlandimik ilisarititsinissatta tulliani St. Anthonymut qaaqqussavatsigit, tassanilu tunisassiorfimmi ullut qanoq ingerlasarnersut kiisalu raajanik issittup imartaaneersunik Tuluit Nunaannut ingerlaqqittussanik poortuineq malinnaavigisinnaavat.
Royal Greenland naapiguk pillugu
Royal Greenland naapiguk pillugu
'Royal Greenland naapiguk' pillugu allaaserisatsinni Royal Greenlandip immikkoortortaani assigiinngitsuni takornariartissavatsigit; Nunatta kitaata sineriaani tunitsivinnit minnerniit kilisaassuarnut avaatsiorlutik tunisassiortunut, nunani tamalaani tuniniaavitsinniit allarpassuarnut.
