#6: Old Perlicanimut, tunisassiorfimmut tamatigoortumut Newfoundlandimiittumut tikilluarit
Old Perlican Newfoundlandimi Avalonip qeqertaasaata nuaani avannarlermiippoq, ukiullu 300-t sinnerlugit aalisartoqarfiusimavoq. Ullumikkut Royal Greenlandip Canadami saattuanik tunisassiorfiisa annersaat Old Perlicanimiippoq, tassani suliffeqarfik najukkamilu inuiaqatigiit suleqatigiipput.
"Anaanarsuaq". Chris Butleritp, Old Perlicanimi tunisassiorfimmi ingerlatsisup najukkamilu tunisassiornermut ingerlatsisup, Royal Greenlandip tunisassiorfia Old Perlicanimiittoq taama nassuiarpaa. "Old Perlican Quin-Seap nunap ilaani aallussaani anaanarsuuvoq". Quin-Sea Royal Greenlandip piginneqataalluni Newfoundlandimi Labradorimilu 2016-imili ingerlatsiviatut qeqertami Newfoundlandimi tunisassiorfinnik arfineq-marlunnik ingerlatsisuuvoq, Old Perlicanilu annersaavoq. Tassani pissuseqatigiiaappassuit, matumani saattuat, saarullernat, kissavaasat, saarulliit aalisakkallu natermiut ikerinnarmiullu allat tunisassiarineqartarput.
Old Perlican Trinity Bayimut Conception Bayimullu qanikkami aalisarfitsialaat eqqaanni inissisimalluarpoq. Illoqarfik aalisartoqarfiusoq nunap ilaani aalisarnermi ukiuni 300-nit amerlanerusuni ilaavoq, ullumikkullu Royal Greenlandip aalisakkanik saattuanillu tunisassiorfia annerpaaq tassaniippoq.
Tunisassiorfik Old Perlicanimiittoq nioqqutissanik piareeriikkanik niuerfinnut USA-miittunut, Europap kitaaniittunut avannaaniittunullu, Kinamut Kangianilu nunanut allanut tunisaramigit Royal Greenlandip nunani tamalaani aallussaqarneranut ilanngussivoq.
Tunisassiorfik marsimi takuniaratsigu silaannaq aasaanerani tunisassiorfiup 300-nik sulisoqarluni ulapaarfigisartagaanut sanilliullugu eqqissisimaneroqaaq.
Maanna ukiup naajartornerani ukioq naallugu sulisartut 15-it aserfallatsaaliillutik, tunisassiorluni ulapinnissamut piareersarlutik aammalu pitsaassusilerinermi oqartussanullu nalunaarsuinermi suliassanik pingaarutilinnik suliaqarlutik ulapileruttorput.
Ulapaarfimmi, apriilimi saattuarniarnermik aallartittartumi, avatangiisit ulapaarfiusut tunisassiorfimmilu silaannaq nuannersoq misigissavatit, tassani illarsaaruttoqarlunilu nipilersuutinik nipituumik tusarnaartoqartarpoq. Tunisassiorfimmi sulisut qaqugumulluunniit angerlarsimaffigisinnaasanimmik neqeroorfigineqartarput, nerisarfillu nutaaq ulapaarfiup nalaani peqqinnartunik namminerlu nerisassianik sassaalliisarpoq.
Akiuulluarsinnaanermik oqaluttuaq
Ukiorpassuarni aqutsinerluttoqareersoq 1992-mi Canadami naalakkersuisut Newfoundlandimi saarullinniartoqarunnaassasoq suaarutigaat, tamatumalu kingunerisaanik inuppassuit titusindtilikkaat suliffitik annaavaat. Taamaakkaluartoq innuttaasut qaangiisinnaasimagamik, aallaqqaammut raajat issittup imartaaneersut ukkataralugit, saattuanik tunisassiornermut nuupput. Old Perlican akiuulluarsinnaanermigut er med sin modstandsdygtighed sungiussiassuseqarnermigullu allannguinernut nalimmassassalluni pikkorilluinnarpoq. Illoqarfimmi tunisassiorfik kingorna allanik tunisassiulerpoq, allineqarlunilu amerlanerusunik tunisassiorsinnaanissamut aningaasaliivoq, maanna saattuanik, raajanik, saarullinnik, saarullernanik kissavaasanillu tunisassiortarluni.
Ullumikkut aalisartorpassuit untritilikkaat pisatik pissuseqatigiiaat assigiinngitsut tunisassiorfimmut Old Perlicanimiittumut tunisarpaat.
Jessie Power suliffeqarfimmi ukiuni 35-ni sulisimavoq, sulinerminilu pissuseqatigiiaat assigiinngitsut suliarisarsimallugit oqaluttuarpoq. Old Perlican-imi tunisassiassaq sapinngisamik tamaat atorluarniarsarisarpaat: "Assersuutigalugu saarullilerigaangatta suna tamaat piiartarparput, soorlu oqaat, niaqui nerpiilu". Aalisarneq Old Perlican-imi inuunermi toqqammaviusoq Jessiep aamma nassuiaatigaa, Royal Greenlandillu najukkami pinnguartarfimmut timersortarfimmullu aningaasanik tunisinermigut najukkami inuiaqatigiinni ineriartornermut tunisassiorfimmullu aningaasaliinera qujamasuutigaa.
Shawn Tizard, poortuivimmi ataqatigiissaarisoq nakkutilliisorlu, 30nik ukioqartoq suliffeqarfimmi ukiuni 14-ini sulisimavoq. Shawn saattuanik tunisassiorfimmi aallarteriarluni Old Perlicanimi suliffeqarfik tamaat suliffiginikuuaa, matumani ukiualunni tulattarfimmi, raajaleriviup uunnaaviani kingornalu poortuivimmi: "Ukiuni kingullerni tunisassiorfimmi pitsanngorsaasoqangaatsiarpoq, tunisassiorfillu innuttaasunut iluaqutaavoq".
Old Perlican-imi borgmesterip eqqarsaatersuutai
Clifford Morganip, Old Perlicanimi borgmesterip, najukkami innuttaasut ataannarnissaannut tunngatillugu najukkami suliffeqarfiit suleqatigiilluarnissaat pingaartitaraa: Ukiut ingerlanerini aalisarnermut tunngatillugu iluatsittoqartarlunilu iluatsinngitsoortoqartarpoq. Ukiut qulikkaat arlallit matuma siorna saarullinniarneq ajalusoormat illoqarfitta siunissaa qaamanngilaq. Aalisarnerulli taamatuttaarli aalisakkanut qalerualinnullu tunisassiorfiit nalimmassarnerisigut pissuseqatigiiaat allat tunisassiarineqartalerput.
Royal Greenland Old Perlicanimi ullumikkut annersaraat, tassanilu saattuat, raajat, saarullernat kissavaasallu tunisassiarineqartarmata pisariaqartumik qujamasuutigineqartumillu assigiinngisitaartoqarlunilu atugarissaartoqarpoq. Royal Greenland najukkami innuttaasunut suliffittut pingaaruteqarluinnarpoq, sunngiffitsinnilu sammisartakkatsinnik, timersuutitsinnik isumaginninnermilu suliarisartakkatsinnik soqutiginninnerat najukkami innuttaasunut iluaqutaallunilu ilaqutariit atugassarititaannut pitsanngorsaanermik qulakkeerinneqataavoq."
Borgmester Morgan nangippoq: "Royal Greenlandip tunisassiorfik Old Perlicanimiittoq pisiarigamikkuli tunisassiat qaffasissumik pitsaassusillit niuerfinnut nunani tamalaaniittuni tuniniarneqarnissaat qulakkeerniarlugu tunisassiorfimmut aningaasaliingaatsiarnikuupput."
Royal Greenland Old Perlicanimi innuttaasut suliniutaannut arlalinnut tulluusimaarluni aningaasaliisuuvoq, matumani ilaatigut Old Perlican Recreation and Arena Committee-mut aamma inuusuttunut, ilaqutariinnut utoqqarnullu aaqqissuussanut.
Siunissamut isigineq
"Anaanarsuaq ullumikkut anaanarsuarlu siunissami", Chris Butler eqqarsaatersorpoq: "Old Perlicanimi Royal Greenlandip siunissaa eqqarsaatigigaanni suliffeqarfik illoqarfillu Old Perlicanip ukiorpassuarni tulliuttuni aalisartoqarfiunissamini najugaqarfitsialattut, suliffitsialattut ilaqutsiorfissatsialattullu ilisimaneqarnissaa anguniarlugu suleqatigiipput".
Royal Greenlandip suliffeqarfissuata sinnerani niuerfinnik eqqumaffiginninneq ataatsimoorussillunilu siuarsaaneq Chrisimut aamma ersarippoq: "Suliffeqarferujussuarmi pissuseqatigiiaarnik aallussanik arlalinnik nunanilu tamaalaani niuerfinnik ataatsimoorussiffiusumi ilaaneq niuerfinnut atassuteqarnermut pitsanngorsaataallunilu tunisassiatta nunani tamalaani ilisimaneqarnissaannik qulakkeerinnittuuvoq".
"Royal Greenland naapiguk" pillugu
"Royal Greenland naapiguk" pillugu
Royal Greenland naapiguk' pillugu allaaserisatsinni Royal Greenlandip immikkoortortaani assigiinngitsuni takornariartissavatsigit; Nunatta kitaata sineriaani tunitsivinnit minnerniit kilisaassuarnut avaatsiorlutik tunisassiortunut, nunani tamalaani tuniniaavitsinniit allarpassuarnut. Royal Greenland Naapiguk atuarluariuk!
