The North Atlantic Champion v.4

Aallaqqaasiut

Time:

Royal Greenlandip 2013-mili periusissiaq North Atlantic Champion najoqqutaraa.

Siulersuisut periusissiami saqqummersitaq nutaaq – North Atlantic Champion saqqummertut sisamassaat siorna akueraat. Royal Greenlandimi pisortaaneq Mikael Thinghuustaama oqaluttuarpoq.

- The North Atlantic Champion saqqummersitat sisamassaanni sammisat pingaarutillit sisamat sammineqarput, Royal Greenlandilu sammisani taakkunani naleqalersitsilluassaguni sulilluartariaqarpoq. Sammisat tassaapput niuernikkut naleqalersitsineq, niuerfiit tuniniaaviillu kiisalu annertusaaneq akisussaaffillu, Mikael Thinghuus oqarpoq.

Periusissiaq suliffeqarfiup najoqqutarissavaa

North Atlantic Championip pilersinnerani tunisassiassat Royal Greenlandip pisarisinnaasaasa nalitusarnissaat siunertaasimavoq. Tamanna aamma saqqummersitamut kingullermut atuuppoq.

- Aalisakkat qaleruallillu pisarisinnaasatta atorluarnerisigut nalitusaarusuppugut. Pisuussutinik amerlassutsimikkut killilinnik piujuartitsinermik tunngavilimmik tunisassiorniarutta taamaaliortariaqarpugut, Michael Thinghuus nassuiaavoq.

Immikkoortut pingaarnertut sammineqartut sisamat anguniakkap angunissaanut piviusunngortitseqataassapput.

Pingaarnertut anguniakkat sammineqarput

Royal Greeenlandimi immikkoortut sisamaasut 2024-ip tungaanut suliniutigineqassapput.

• Naleqarnerulersitsineq. Royal Greenlandip tunisassiat ataasiakkaat naleqarnerulersissavai.
• Annertusaaneq. Matumani tunisassiatigut, niuerfinni aningaasatigullu ineriartorneq pineqarput.
• Niuerfiit tuniniaaviillu. Royal Greenlandip nunani tuniniaavinnilu assigiinngitsuni akit pitsaanerit ujartussavai.

• Piujuartitsineq. Suliniutit aalisarnermut, aningaasaqarnermut minnerunngitsumillu sulisunut najukkanilu inuiaqatigiinnut tunngasut piujuartitsinermik tunngavilimmik ineriartorfiussapput.

Nalitusaaneq

Time:

Tunisassiassat atorluarlugit Royal Greenlandimut naleqarnerulersinniarneranni iliuuserisinnaasagut tamaasa iliuuserissavagut. Tamanna North Atlantic Championip saqqummersitaasa sisamaanni qitiulluinnarpoq.

Royal Greenland aalisakkanik qalerualinnillu pitsaalluinnartunik ullut tamaasa imaanit pisaqarisartakkatsinnik pisuussuteqarluarpoq.

Pinngortitamili pisuussutit amerlassutsimikkut killeqarnerat unammillernarsinnaavoq. Tamanna North Atlantic Championip saqqummersitaasa sisamassaanni sammineqarpoq.

- Periusissiami niuernikkut nalitusaallunilu annertusaaneq qitiutinneqarput. Siunissamut ungasinnerusumut nalitusaanissaq sulissutigaarput, matumanilu aalisakkat qaleruallillu piujuartitsinermik tunngavilimmik aalisarlugillu tunisassiarissavagut, Royal Greenlandimi pisortaaneq Mikael Thinghuus nassuiaavoq.

Aalisarnerulernissarli taamaallaat eqqarsaatiginagu allatut suleriuseqartariaqarpoq.

- Pisuussutit amerlassutsimikkut killeqarmata Royal Greenland periuseq ataasiinnaq malillugu siunissamut ungasinnerusumut ingerlalluarsinnaavoq. Tassa tunisassiassat pisarisinnaasatta atorluarnerisigut niuerfinni nalitusaasariaqarpugut, Mikael Thinghuus itisiliivoq.

Nutaamik tunisassioriaaseqarneq

Qanoq iliornissamut ingerlatseqatigiiffiup tunisassiaani ingerlalluarnerpaat ilaat tassaasut raajat uusut qalipaajakkallu assersuutaalluarsinnaapput.  

Matumani Royal Greenland ukiorpassuarni nunani tamalaani sulilluarnermigut nunarsuarmi tamarmi pilersuisuni siuttunut ilaavoq. 

- Assersuutigalugu raajat salaatinut akugalugit imaluunniit piareereerlugit nereriaannaat pisisartutsinnit mamarineqarpata, taava tunisassioriaatsinik poortueriaatsinillu nutaaliussaagut, Mikael Thinghuus oqarpoq.

Niuerfinnut aalajangersimasunut tuniniaasoqassaaq

Tamatumunnga ilutigalugu niuerfiit nunallu aalisakkat qaleruallillu Royal Greenlandimeersut tunisassiatigut ineriartorfigilluarsinnaasaat aallunneqassapput.   

Assersuutigalugu qanoq ililluta raajat uusut qalipaajakkallu Europap avataani tunisaanerat annertunerulersissinnaavarput, imaluunniit qanoq iliorutta Kinamiut saattuat raajat qalipalittulli mamaritigilersinnaavaat, Mikael Thinghuus oqarpoq.

Annertusaaneq

Time:

Royal Greenlandip annertusaanini ukiuni aggersuni ingerlatiinnassavaa. Tunisassiatigut, tuniniaanikkut niuerfinnilu periarfissatigut annertusaasoqassaaq. Tamanna North Atlantic Championimi saqqummersitat sisamaanni pingaarutilimmik inissisimavoq.  

North Atlantic Championimi saqqummersitat sisamaat arlalinnik sammiveqaraluarluni Royal Greenlandimi annertusaanissaq tunngaviusumik siunertaavoq.

Tunisassiatigut tuniniaanikkullu annertusaaneq pineqarpoq aammattaarli sumiiffinnut nutaanut appakaannikkut annertusaasoqassaaq. Taama oqaluttuarpoq Royal Greenlandip pisortaanera Mikael Thinghuus.

- Patajaatsumik inissisimajuarnikkut tunisassiagut annertusassavagut, tamatumalu anguniarnerani pissuseqatigiiaat nalituut niuerfinni anguniakkatsinnut tapersiisussat annertusaavigissavagut, Mikael Thinghuus nassuiaavoq.

Periarfissanut nutaanut tappissuseq

Niuerfinni periarfissanut takkuttartunut tappissuusariaqarpoq, Mikael nassuiaavoq.

- Avatangiisit sungiusimasagut kisiisa pinnagit nunarsuarmi periarfissanut appakaatissaagut.

Assersuutigalugu Amerikami Avannarlermi ineriartorneq annertusarneqassaaq, Royal Greenlandili niuerfimmi periarfissanik ammaassisoqaraangat piareersimajuassaaq. Tamatuma saniatigut kujavartissaagut.

- Maannakkorpiaq Amerika Kujallermi niuernitta annertusarnissaanut periarfissarsiorpugut, Mikael Thinghuus oqarpoq.

Royal Greenland ullumikkut assersuutigalugu Chilemi ingerlatseqatigiiffinnut marlunnut piginneqataavoq. Taamaaliornikkut pissuseqatigiiaat nalituut saattuat aalisakkallu Chilean Seabassit pissarsiarineqarsinnaalerput.

Aningaasaliinerit niuernermik patajaallisaajuassapput

Nutaanik suliniuteqarnikkut Royal Greenlandip niuernerata patajaallisarnissaa piumasaqaataavoq, Royal Greenlandili naleqalersitsiartornermi ingerlaatsimut aningaasaliisoqartillugu nalitusaasinnaasariaqarportaaq.

- Patajaatsumik inissisimanerput illersorlugulu periarfissanut nutaanut anguniakkatsinnut tapersiisunut alaatsinaattuarnissarput North Atlantic Championimi saqqummersitat sisamaanni qitiulluinnarpoq, pisortaaneq Mikael Thinghuus oqarpoq.

Royal Greenland ullummikkut nunani aqqaneq pingasuni aallussaqarpoq.

Niuerfiit tuniniaaviillu

Time:

Royal Greenland pisisartut piumasaat, tuniniaaviit niuerfinnilu pissutsit pillugit ilisimasaqarnerulissaaq. Tamanna annertusaaqqinnissamut aqqutissiuussissaaq.

Ilisimasaqarnikkut niuerfinni periarfissanik atorluaasoqarsinnaavoq. 

Taamaammat North Atlantic Championimi saqqummersitat sisamaanni pisisartut piumasaat niuerfinnilu tuniniaaviit paasilluarnissaat sammineqarpoq.

- Tunisassiat aalisartakkagut, tunisassiarisartakkagut tuniniartakkagullu amerlassutsimikkut killeqarput. Taamaammat tunisassiatta niuerfinnut aalajangersimasunut tunisassiatsinnik naleqartitsilluinnartunik pisisartulinnut niuerutiginissaat pingaaruteqarpoq, Royal Greenlandimi pisortaaneq oqaluttuarpoq.

Kangiani periarfissaqarluarpoq

Royal Greenlandip Kangiani tuniniaaneq ingerlaavartumik patajaallisarsimavaa. Tamanna North Atlantic Championimi saqqummersitat sisamaanni annerulersinneqassaaq.  

- Kangiani tunisassiatta amerlinerisigut niuertarfeqarfiillu aqqutigalugit niuerfinnut appakaannerunikkut kiisalu najukkani nittartakkatigut niuertarfinnik pilersitsinikkut annertusaassaagut, Mikael Thinghuus itisiliivoq.

Royal Greenlandip Kinami niuertarfeqarfinni aammattaarli kinamiunik Beiyang Jiameimik suleqateqarnikkut nittartakkatigut niuertarfinni angisuuni meqqitut pitsaalluinnartutut ilisimaneqalernissaa sulissutigissavarput. 

Europami Amerikamilu Avannarlermi ineriartulerneq

Europami tunisassiat nalituut patajaallisarneqarlutillu igaffissuaqarfinnut tunisat amerlisarneqassapput.

- Niuerfimmi tunisassianik piareereerlugit nereriaannarnik tuniniaaviusumi unammillersinnaasariaqarpugut. Aammattaaq qarasaasiatigut piginnaasaqarnerulernikkut niuertarfeqarfiit maanna pisisartorisatta nittartakkatigut niuertarfiini annertusaassaagut, Mikael Thinghuus oqarpoq.

Royal Greenland Amerika Avannarlermi saattuanut tunngatillugu patajaatsumik inissisimavoq, tamanna ilaatigut immikkoortortatut ingerlatseqatigiiffik Quin Sea Fisheries aqqutigalugu pivoq. Taamatut inissisimaneq patajaallisarneqassaaq.

- Saattuanut tunngatillugu patajaalluinnartumik inissisimanitta atorluarneratigut tunisassiatsinnut tamakkiisumik periarfissarsiussaagut, Mikael Thinghuus oqarpoq.

Tamanna ilaatigut peqqutigalugu Royal Greenland pisisartunut qaninnerulerumalluni USA-mi tuniniaanermut allaffeqarfik pilersitsivoq. 

Piujuartisineq

Time:

Royal Greenland piujuartitsineq tunngavigalugu ineriartortitsinissamut akisussaaffimmik tigusissaaq. Imaanngitsoq taamaaliortariaqaratta, kisiannilí taamaaliorusukkatta. Tamanna North Atlantic Championip saqqummersitap sisamaannut ilaavoq.

Royal Greenland The North Atlantic Champion saqqummersitaq 4 malillugu ersarissumik isummeqqippoq. Suliffeqarfissuaq piujuartitsineq sutigut tamatigut tunngavigalugu ingerlanneqassaaq.

Royal Greenlandimi pisortaaneq Mikael Thinghuus oqaluttuarpoq.

- Aalisarnitta aallussinittalu piujuartitsineq tunngavigalugu ineriartortinnissaat qulakkeerniarlugu aalisakkerinermik suliaqartuni siuttunngorumanitsinnut peqqutaavoq. Angorusutarput eqquutsinniarlugu CSR-ilerinermi ESG-lerinermilu pilersaarusiagut naapertorlugit aaqqissuussinikuuvugut.

Pilersaarutit piujuartitsineq tunngavigalugu ineriartortitsinermut FN-ip nunarsuarmi tamarmi anguniagaanik tunngaveqarput, North Atlantic Champion saqqummersitami 4-milu qulequttatimmikkut ukkatarineqartussat toqqarneqarput.

- Ilinniartitaaneq pitsaassusilik, suliffiit naapertuuttut aningaasarsiornikkullu siuariartorneq, akisussaassuseqartumik atuineq tunisassiornerlu kiisalu imaani uumassusillit toqqarpagut, Mikael Thinghuus oqarpoq.

Piujuartitsineq sivitsortumi aallunneqarpoq

Royal Greenland aatsaat piujuartitsinermik aallussilinngilaq. Suliffeqarfiup najukkami ilinniarfiit timersornerlu qangali tapersersugarai.

Taamatuttaaq Kalaallit Nunaanni nunami sulisut marloriaatinngornissaat ukiuni kingullerni quliinnarni anguneqarpoq.

- Sulisut najukkamilu aalisartut piginnaasaasa inerisarnerisigut pisisartunut najukkanilu inuiaqatigiinnut peqataaffigisatsinnut naleqalersitsivugut, Mikael Thinghuus oqarpoq.

Kilisaatit nutaat nukissamik atorluaanerusut sanatinneqarneri Royal Greenlandip piujuartitsinerunissaq anguniarlugu suliniutaannut assersuutaapput tigussaasut, taakkunanngalu sisamat tiguneqarlutik atulersinneqareerput.

Akisussaassuseqarneq siunissami angusarissaarnissamut qulakkeerinnissutaassaaq

Royal Greenland tamatumunnga ilanngullugu piujuartitsineq pillugu aningaasaliiuassaaq.

- Aalisakkat qaleruallillu pisarisartakkatta 100 procentimik atorluartarnissaat anguniarparput. Suliassaq unammillernarpoq, ingammik nunatsonni attaveqaasersuutit immikkuullarillutillu ajornakusoorsinnaatillugit, Mikael Thinghuus oqarpoq.

Silaannaap allanngoriartornera pissutigalugu nunarsuup aseroratarsinnaanera nalorninartuuvoq, silaannaallu allanngoriartornera Kalaallit Nunaanni takuneqarsinnaalereerpoq. Taamaammat piujuartitsineq tunngavigalugu ineriartortitsinerup tapersersornissaa Royal Greenlandimut aamma pingaaruteqarpoq.

- Akisussaassuseqarneq Royal Greenlandip siunissaq ungasinnerusoq eqqarsaatigalugu angusarissaarnissaanut qulakkeerinnittuussaaq. Akisussaassuseqartumik ingerlatserusuppugut, imaanngitsoq taamaaliortariaqaratta, kisiannili taamaaliorusukkatta, Mikael Thinghuus naqissusiivoq.