Imermik atuineq
Imermik tarajoqanngitsumik saliineq atoqqiinerlu ukiuni kingullerni ineriartupiloorpoq
Imeq tarajoqanngitsoq minguitsorlu pisuussutaavoq tunisassiorfitsinnut tamanut pingaarutilik.
Imeq tarajoqanngitsoq nunap qaavaneersuusinnaallunilu iluaneersuusinnaavoq. Imeq tarajoqanngitsoq suminngaanneernera apeqqutaatinnagu najukkami suliffeqarfinnit pilersuisunit pajugutigineqartarpoq.
Kalaallit Nunaata ilaani imeq tarajoqanngitsoq pissarsiariuminaappoq, taamaammallu tarajuiaat (RO-anlæg) atorlugu imermik tarajoqanngitsumik pilersuisoqartarpoq. Periuseq akisullunilu pisariuvoq, taamaammat imeq imaaneersoq salillugu atorneqartalernissaanut periarfissarsiortoqarpoq.
Nalorninartut periarfissallu
Nunatsinni nunaqarfinni illoqarfinnilu 37-ini Royal Greenlandip aallussaqarfigisaani imeqassutsip misissornerani Nukissiorfiit pilersuisutut nalunaarsuinerat malillugu sumiiffiit 21-t imissaqarluarput, sumiiffiit arfineq pingasut naleqquttumik imissaqarput sumiiffiilli allat arfineq pingasut imissakilliortut.
Erngup imaaneersup imerneqarsinnaasutut pitsaassuseqalersillugu salinneqartarnissaanut periarfissaqarpoq. Misileraanigut inerneqarluarput, sulili ajoraluartumik aalisakkanut ilivitsunut atorneqarsinnaanerata saniatigut allanut atorneqarsinnaanera akuersissutigineqarsimanngilaq.
2022-mi iliuutsit inernerillu
Suliffeqarfissuarmi tamarmi tunisassiat piareeriikkat 1 tonsiugaangata imermik atuineq 2021-mut naleqqiullugu qaffassimavoq, ukiunili pingasuni siuliini allanngujaatsumik inissisimasimavoq. Matumani tunisassiorfik ataaseq peqqutaavoq, tassami tunisassiorfimmi atuinerup qaffannera qaffaanerup tamakkiisup 70%-anut patsisaavoq.
2019-2022-mut anguniakkat piviusunngortitsinerillu
Anguniakkat:
- Suliffeqarfissuup tunisassiorfiini imermik atuinerup ukiumut 5 %-it missaannik annikillinissaa
- Illoqarfinni nunaqarfinnilu imermik tarajoqanngitsumik pissarsiffiugimaatsuni erngup tarajoqanngitsup imermik tarajulimmik taarsernissaa
Annikillisaanissaq anguniarneqaraluartoq tunisassiat piareeriikkat 1 tonsiugaangata imermik atuineq piffissami tassani allanngujaatsumik inissisimasimavoq. Pingaartumik raajanik tunisassiorfiit imeq tarajoqanngitsoq atorlugu raajanik uutsillutillu nillorsiisartut imermik atuingaatsiartarput. Taamaakkaluartoq nunatsinni raajanik tunisassiorfimmi ataatsimi 2020-miit 2022-mut imermik atuinerup 20%-nik apparsimaneratigut siuariangaatsiartoqarsimavoq.
Tamakkiisumik isigissagaanni imermik atuinerup annikillisinnissaa ajornakusoorsimavoq, tassami tunisassiorfiusuni eqqiluisaarluarnissaq pingaaruteqarpoq, aamma tunisassiat eqqarsaatigalugit.
Imeq imaaneersoq Nutaaq-mik tunisassiornerup aallaqqaataani taamaallaat pilersuisinnaasutut akuerineqarnikuuvoq. Imeq imaaneersoq salitaq aalisakkanik tunisassiornermut atugassatut suli akuerineqarsimanngilaq.
2030-mut angorusutat:
- 2018-mut sanilliullugu katillugit 20 %-inik annikilliliineq
- Imermik imerneqarsinnaasutut pitsaassusilimmik ataavartumik pilersuinissaq
