Sustainability Awards 2023
Dansk Erhverv-ip aamma EY-p Royal Greenland Green Transition Award-imik nersornaaserneqarnissaanut innersuuppaat, nersornaat suliffeqarfiit piujuartitsineq tunngavigalugu ingerlatsinermik annertuumik aallussinermikkut piujuartitsinermik tunngaveqarluni ineriartortitsinermi suleqataasunut tunniunneqartarpoq.
Royal Greenlandimi piujuartitsinermut periusissatut pilersaarut FN-imi piujuartitsineq tunngavigalugu anguniakkanit nunarsuarmut tamarmut atuuttunit 17-iusunit aallaaveqarpoq, taakkunanilu sisamat immikkut suliniuteqarfissatut toqqarneqarsimapput.
Anguniagaq nr. 14: Imaani uumassusillit Royal Greenlandip Sustainable Fisheries Greenland suleqatigalugu aalisarnerit nungusaataanngitsumik aqunneqarnerisa takussutissaqarnissaannut kiisalu akuersissuteqalernissaannut suliniuteqarneranut ikaarsaarnermi 2011-mili pingaarutilittut tunngavigineqarpoq. MSC-mi piumasaqaatit aallaavigalugit nunatta imartaani aalisarnermik atuutsitsilerneq aammattaaq aalisakkerinermik suliallit allat, najukkani aalisartut peqatigiiffii, Kalaallit Nunaanni Pinngortitaleriffik oqartussallu annertuumik suleqatiginerinik tunngaveqarpoq.
Nunatta kitaata imartaani raajarniarneq, suleqatigiinneq tamanna tunngavigalugu, nunatta imartaani aalisarnerni siullersaalluni 2013-imi MSC-tut akuerineqarpoq. Kingorna aalisarnerit allat aamma akuersissuteqalerput, taamaalillutillu Royal Greenlandip 2023-mi tunisassiassaataasa 63%-ii pingajuusumit akuersissuteqarput.
Aalisarnerup illoqarfinni nunaqarfinnilu siunissaa
Royal Greenland nunatta illoqarfiit nunaqarfiillu nalunaarsukkat 65-iusut akornanni 37-ni tunisassiorfinnik tunitsivinnillu ingerlataqarpoq. Najukkani aalisartut tunitsivissaqarnissaat innuttaasunut pingaaruteqarluinnarlunilu nunatsinni sumiiffinni assigiinngitsuni ilaqutariippassuarnut inuuniutaavoq. Aalisartut 2.000-it pallillugit amerlassuseqartut, matumani amerlanerpaat umiatsiaararsortuusut, pisatik Royal Greenlandimut tunisarpaat.
Aalisarnerit umiatsiaaqqanik aalisartorpassuaqartut ilaatigut ajornakusoorsinnaagaluartoq akuersissuteqalernissamut aqqutissaapput, taamatuttaarlu paasissutissanik, nalunaarsuinernik aqutsineq pitsanngorsarniarlugu Fisheries Improvement Projects-inik (FIP, tassa aalisarnermik pitsanngorsaanermut suliniutinik), ingerlatsinissaq pisariaqarpoq.
2030-mut anguniakkat ilagaat Royal Greenlandip aalisarnerisa 75 %-iisa pingajuusumit akuersissuteqalernissaat, suliarlu nunami aalisartorpassuit innuttaasullu ilaatigut qanimut suleqatigalugit ingerlanneqarpoq.
Innersuunneqarneq tulluusimaarutaavoq
Ukiumi matumani piujuartitsinermut ikaarsaartunut nersornaammut innersuunneqarneq Royal Greenlandip piffissami sivisuumi aqutsinermik takussutissiinermillu suliniutaanik akuerinninneruinnarani aammali kilisaataatinik nutarsaanermik suli maannamut ingerlaartumik akuersinerullunilu silaannaap pissusianut sunniutinik nalunaarsuinermut tunisassiallu silaannaap pissusianut sunniutaannik (carbon footprint) nalunaarsuinermut akuersineruvoq.
Royal Greenlandip innersuunneqarnera aamma piujuartitsinermik suliaqarneq taassumunngalu ikaarsaarneq pillugu Piujuartitsinermik suliaqarnermi siunnersortaaneq Lisbeth Schönemann-Paul oqaluttuartoq tusaajuk:
