Aningaasarsialeriffimmi sulisut plastikimik atuinertik annikillisippaat
Royal Greenlandip Nuummi allaffeqarfiani aningaasarsialeriffimmi sulisut siornatigut eqqaaviit arfineq pingasut atortakkatik atorunnaarlugit siunissami eqqaavik ataasiinnaaq atortalerniarpaat. Plastikimik atuinertik annikillisinniarlugu taamaaliorput.
Allattoq Inga Egede, ineg@royalgreenland.com- Immikkoortortami sulisut arfineq pingasuulluta eqqaaviit plastikitallit arfineq pingasut atussallugit pisariaqarsorinnginnatsigit eqqaavik ataasiinnaaq atortarniarlugu aalajangerparput. Siornatigut tamatta immikkut eqqaaveqarpugut tamarmik plastikitalinnik, plastikimilli atuinerput annikillisinniarlugu siunissami eqqaavik ataasiinnaq atortalerniarlugu aalajangerpugut, taama oqarpoq Royal Greenlandip Nuummi allaffeqarfiani aningaasarsialeriffimmi immikkoortortami aqutsisoq, Helene Heilmann.
Avannaani kommunit ilaata eqqaavit ikittuinnaat atornerisigut plastikimik atuninertik annikillisissimagaat tusareerlugu Helene Heilmannip eqqaavimmik ataasiinnarmik atuilernissartik suleqatiminut siunnersuutigaa.
Royal Greenlandip Nuummi allaffeqarfiani aningaasarsialeriffimmi sulisut aamma ukiuni arlaqalersuni pappiaqqanik naqititeritillutik quppernerit illuttoruullugit naqititerivigisarpaat.
- Avatangiisimik mingutitsinnginnissaq pingaartikkatsigu taamaaliorpugut, Helene Heilmann oqarpoq.
