Ukioq manna ilinniartunik bootcampertitsineq iluatsilluarpoq

Ilinniartut piginnaasaasa nukittorsarnissaat kiisalu nammineq inuunerminni sulinerminnilu unammillernartunik suliaqarnissaannut sakkussaqarnissaat bootcampertitsinermi siunertaavoq.

Ukioq manna ilinniartunut bootcampi Nuummi 2022-mi aggustip 15-ianniit 17-iata tungaanut ingerlanneqarpoq. Bootcampi iluatsilluartoq Sisorarfiit illorsuanni ingerlanneqarpoq, tassanilu Royal Greenlandip sulisoqarnermut immikkoortortaani sulisut pingasut pikkorissaasuupput.

Pikkorissarnermi ilinniartut nammineq inuttut unammillernartitaat sammineqartarmata tamanna peqataasut ilaannut sakkortusinnaavoq.

• Royal Greenlandip ilinniartunut ilisaritinnerata saniatigut inuttut ineriartorneq suleqatigiissinnaalernissarlu annermik sammisarpagut. Inuttut ineriartorneq pillugu sammisat peqataasunut ataasiakkaanut inuunerminni sakkortuunik misigisaqarsimasunut sakkortusinnaapput. Ilaatigut qiasoqartarpoq, tamatigulli misigissutsitigut oqiliallannermik kinguneqartarpoq, pikkorissaaqataasoq Ungaaq Abelsen, ulluinnarni Royal Greenlandip sulisoqarnermut immikkoortortaani ilinniarnermut siunnersortiusoq, oqaluttuarpoq.

Pikkorissaasut

Ilinniartut

Ilinniartut

Bootcamp

Bootcamp

Inuunermi sakkussat

Ilinniartut isumalluartut qulingiluat Nuummeersut Sisimiuneersullu bootcampimut pimoorussiffiusumut ullaamiit unnummut ingerlanneqartartumut peqataapput. Taakku akornanni ilinniartoq 25-nik ukiulik Aka Thor-Møller ilaavoq.

• Bootcampertitsisoqartartoq siornatigut tusarnikuugakku inuttut ineriartorneq pillugu ilikkagaqarnissara naatsorsuutigereerpara. Eqimattanut pingasunut avinneqarpugut, tassanilu sakkussat periutsillu atussallugit ilikkagassagut saqqummiunneqarput. Sulinermiinnaanngitsoq aammali nammineq inuuninni aqqusaagassat assigiinngitsut anigornissaannut sakkussaqalerlunga misigaanga, Aka, akissarsialerivimmi ilinniartuusoq kiisalu aningaasaqarnermi pigisanillu nalilinnik aqutsinermi AU-tut ukiut aappassaat ilinniartoq, oqaluttuarpoq.

Bootcampi ilinniartut naliliisinnerannik naggaserneqartarpoq, tassanilu saqqummiunneqartut ilinniartoqarnermi pitsanngorsaanissamut atorluarniarneqartarput.

• Bootcampi suliffeqarfimmi ilinniartuuteqarnermut suliniuteqarnitta pitsanngorsaaviginissaanut aamma atortarparput. Ilinniartut tusarnaartarpagut, ilinniarnerullu ingerlarnga pitsaasuutikkumagatsigu suut pitsanngorsarsinnaanerlugit paaserusupparput. Ilinniartut ilinniakkaminnik naammassinninnissaannik ikiornissaat pingaarnertut qitiutipparput, tamannalu piviusunngortittaripput isumaqarpunga, Ungaaq Abelsen naggasiivoq.

Royal Greenlandip nunatsinni ilinniarnermik qaffassaaqataaniarluni FN-ip anguniagaani nunarsuarmut tamarmut atuuttuni nr. 4, najukkami inuiaqatigiinni pitsaasumik ilinniartitsinermut tunngasoq, naapertorlugu suliniuteqarpoq.

Ilinniartut siunissami ingerlalluarnissaannik Royal Greenlandimiit kissaappagut.