Royal Greenlandip ukiumoortumik naatsorsuutit 2023-moortut ullumikkut saqqummiuppai

"Ukioq ilungersunarpoq, ilungersortillutali qajannaassuserput nalimmassarsinnaassuserput misilerartarparput. Suliffeqarfimmi tamarmi aningaasartuutinik nakkutilliinerulerlutalu ingerlatsinermi atorluaanerput pitsanngorsarparput, tamannalu aningaasaqarnikkut unammillernartunut aqqusaakkatsinnut sakkukillisaataassaaq," Susanne Arfelt Rajamand, Royal Greenlandimi pisortaaneq, oqarpoq. 

Ukiup siuliani aningaasaqarnikkut unittooqqaneq atuisullu pisiortornerisa allanngornera pissutigalugit suliffeqarfik niuerfinni Europamiittuni ingerlanerliorpoq. Nerisassanut immameersunut saarullinnullu niuerfiit Europamiittut saarullinnik Ruslandimeersunik akikitsunik eqqussuisoqartuarneranit sunnerneqarput, Japanimilu saattuanik niuerfiit saattuanik Ruslandimeersunik eqqussuinerup qaffanneranit JPY-llu nalingata nikerarneranit sunnerneqarput. Taamatuttaaq tunisinermi akit taamaaginnanngikkunik appariartoramik ukiuni kingullerni marlunni aningaasartuutit ineriartornerannut malinnaasinnaasimanngillat. 

Ukiumi matumani unammillernarnerpaat ilaat tassaavoq Kinamut tunisisinnaanermut akuersissummik annaasaqarnerup kingorna Chilemi niuernermi annaasaqarneq niuerfimmilu USA-miittumi ajalusoorneq suliffeqarfitsinnut eqquingaatsiarpoq. Erniat aamma qaffasipput, tamannalu suliffeqarfimmut aamma sunniuteqarpoq. 

2023-mi akileraannginnermi angusat (255) mio. DKK-jupput. Royal Greenlandip aningaasartuutinik sipaarniarnermut suliniutinik, matumani tunisassiornermi sunniuteqarnerup akimmisaarfeerunnissaanut periusissatut pilersaarummi pingaarutilittut ilanngullugu tunisassiorfitsinnik Matanemiittumik matusivugut. 

"Allannguilluta aallartippugut, taamaaliornikkullu aningaasartuutit suliffeqarfimmiit piiarniarlugit suliat suliniutillu assigiinngitsut misissorpagut. Periusissatut pilersaarut tamakkiisumik atuutilerpat ukiumut sipaarutit minnerpaamik 100 mio. DKK-jussapput," Susanne Arfelt Rajamand nassuiaavoq. 

Niuerfinni avatangiisit ilungersunaraluartut Royal Greenlandip tunisassiani immikkoortukkaani pingaarnerni soorlu raajanik saattuanillu tuniniaanermi niuerfinni inissisimanini attatiinnarsinnaasimavaa, piffissamilu tulliuttumi tunisaqarnerup pitsanngornissaa naatsorsuutigaarput. Aammattaaq niuerfinni patajaatsuni alliartortunilu soorlu Kinami tuniniaanerput annertusivarput, niuerfinnilu atugassarititaasut maannamut atuuttut malillugit tunisassiaqarnitta pitsanngorsarnissaa sulissutigaarput. 

Royal Greenland ukiuni kingullerni qulini nunatta karsianut annertuumik tunniussaqartarpoq, tamatumalu nunanitsinni inuiaqatigiinnut aningaasaqarnermullu tunniussaqartarnerput naqissuserpaa. Tunisassiorfinnik pitsanngorsaaneq ingerlaannassaaq, nunatsinnilu tamarmi najukkani inuiaqatigiinnut akisussaaqataanerput pisussaaffigullu immikkut ukkatarineqassapput. Tamanna akiitsut ernialersukkat annikillisarnissaannit pilersaarutaasumit tunngavilerneqarpoq, ukiunilu tulliuttuni pingasuni sisamaniluunniit aningaasaqarnitsinnut patajaallisaataanissaa naatsorsuutigineqarpoq. 

“Neriulluarluta 2024 qilanaaraarput. Suliniutit aallartitagut, sulisugut aqutsisugullu tunniusimasut peqatigalugit siunissami unammillernartussanut sakkussaqarluarnissaq qulakkeerneqassaaq," Susanne Arfelt Rajamand ilassuteqarpoq. 

Paasisaqarnerorusukkuit saaffissaq: 

Suliffeqarfissuarmi attaveqatigiinnermut ingerlatsisoq Merete Lindstrøm 

meli@royalgreenland.com 

Oqarasuaat: +299 28 18 20